Xoves de contos

Como xa saberedes, todos os xoves as nenas e os nenos de 6º contan un conto durante o recreo na biblioteca para o alumnado que queira asistir. As propias contadoras escollen o conto que van ler, preparan a lectura e fan un debuxo anunciando o contacontos. Cando chega o día, anuncian o conto por megafonía ás 9 da mañá, para que todo o alumnado da escola o escoite e, a continuación, reparten un convite para cada clase.

Este xoves, foi o turno de Noa e Paula, que contaron Orellas de Bolboreta. A biblio estaba ateigada e elas fixérono de marabilla!

Obradoiro de igualdade

Hoxe veu Lidia a contarnos un conto moi fermoso sobre a igualdade e acabamos manchando todas e todos as mans de lila para facer un mural que deixaremos pendurado na biblioteca.

Comezamos cos amadriñamentos/apadriñamentos lectores

Esta semana tivemos a sorte de comezar a compartir momentos lectores cos afillados e afilladas. Os padriños e as madriñas foros buscar aos pequenos/as ás súas aulas e despois estiveron léndolles contos. Algúns estiveron na biblioteca , outros no recanto das familias e polos corredores.
Ollade que vén estiveron:

Día internacional contra a violencia ás mulleres

Aquí vos deixamos algunhas das nosas recomendacións para o 25N.

AMADRIÑAMENTOS LECTORES

Ao longo da semana semana pasada tivo lugar na nosa biblio un acontecemento moi importante: asinamos os contratos de amadriñamento lector! Como podedes ver na imaxe isto supón tanto un compromiso por parte dos pequenos e pequenas do centro como por parte dos maiores, compromiso á escoita, compromiso á atención... Asinar un contrato é algo moi serio!

Que faremos a partir de agora?
Agora que todos os nenos e nenas do centro teñen unha madriña ou un padriño lector, sempre de cursos superiores, xuntaranse unha vez á semana na hora de ler para que estes lles lean un conto. Tratamos deste xeito de favorecer o hábito lector así como favorecer a socialización entre o alumnado de diferentes niveis.

Xoves de contos

Hoxe estreáronse Aitor e Diego como contadores. Escolleron o libro "Manu"

 No recreo contaron o conto, o público estaba moi atento!!

Contamos no recreo

Hoxe foi o turno de Lara e Abril. Estiveron con nós no recreo para contarnos "Cocorico"

Fixérono xenia e o  público quedou encantado!!

Inauguración de Recanto de Construcións

Hoxe tivemos unha grande novidade na biblioteca, inauguramos o "Recanto de Contrucións". Xa podemos idear crear e disfrutar do novo material.

Contamos no recreo

Durante o recreo Marco e Rodrigo contaron "A cabra boba".

Fixérono moi ben!

Maleta de ciencias

Coa maleta de ciencias comezamos novembro, "O mes da ciencia en galego nas bibliotecas"
Gústanos moito a ciencia, e esta maleta contén libros verdadeiramente apaixoantes. Ollade as fotos!!

O Samaín

Este ano celebramos o Samaín por todo o alto. Disfrazámonos, e tivemos o cole repleto de obradoiros do máis terroríficos.
E por suposto, non puideron faltar as lecturas a escuras!

PEREGRINACIÓN ESCOLAR.

Ao longo de toda a semana pasada tivo lugar a I Peregrinación Escolar do Camiño Inglés, na que participou todo o centro.

Os máis pequenos percorreron a primeira milla, ata a Capela das Angustias, outros chegaron ata a Capela de Caranza e os máis maiores percorreron os 10 quilómetros que separan O Porto de Ferrol e o Mosterio de San Martiño de Xubia en Narón.

Foi unha experiencia xenial e aínda que acabamos un pouco cansos e cansas puidemos sentir un como se sinten os peregrinos e peregrinas.

Día das bibliotecas escolares

Hoxe, día das bibliotecas escolares, comezamos cunha actividade moi especial . A partir de hoxe, todos os xoves, virán os nenos e as nenas de 6º de EP a contarnos contos á biblioteca.
Hoxe, Aitana e Iago inauguraron co conto "Sopa Verde" de OQO Editora.

Eles elixiron este conto porque pensaron que lles gustaría aos nenos e nenas máis pequenos da escola. Aitana e Iago prepararon carteis para anunciar o contacontos, anunciárono pola megafonía pola mañá para que todas e todos se enteraran do evento e repartiron un cartel por clase para convidar a todo o alumnado.

No recreo a biblioteca estaba chea de nenos e nenas que querían asistir ao contacontos!
A actividade foi un éxito, os nosos contadores fixérono de marabilla!