PDI: AUGA

Neste segundo trimestre en 1º de Educación Primaria afondamos na auga, ese ben tan importante e imprescindible nas nosas vidas: estados, composición, propiedades, ciclo... Aprendemos moitísimo vocabulario e moitos novos conceptos!

Como auténticos científicos e científicas fomos anotando todo a aprendido e todo o resultado das nosas indagacións no noso caderno de campo. 

Ademais foi tamén unha boa oportunidade para o traballo das medidas de capacidade sempre a través da experimentación.

Como non podía ser doutra maneira como en cada un dos nosos pequenos proxectos contamos coa colaboración das familias, neste caso foi Sonia a que nos trouxo un experimento con xeo que nos encantou! 

CONTACONTOS PARA INFANTIL DE PRIMARIA :2º trimestre

 Neste segundo trimestre ,tamén tivemos os contacontos semanais de todos os mércores ,na hora de ler no patio. Xa forma parte da rutina do alumnado que escoiten un conto dos seus iguais aínda que un pouco maiores. Contos como Pinocho, Cocorico, A casa máis gande do mundo....están presentes no exterior do cole e son moi desexados polos grupos de infantil.

PDI no ciclo Educación Infantil (2º trimestre): AIRE OU VENTO?

  Ao longo do segundo trimestre, no ciclo de Educación Infantil estivemos estudando os segredos do aire, aire ou vento? e o aparello respiratorio .

 Buscamos  información que quixemos coñecer:diferenza entre aire e vento, propiedades como a temperatura, volumen e forza,enerxía eólica,vídeos, bibliografía da biblioteca escolar,material e maquetas  aportadas polas familias...

Realizamos diversas  actividades como: uso do secador para producir aire quente ou frío, ventilador, fuelles, abanos, cometas, parapente,realización dun molinillo,rocket ballon, manga de vento,..Dentro do corpo humano a elaboración das partes do aparello respiratorio con plastilina , temática que inspirounos para o disfrace de entroido.Outras actividades foron aexhibición de voo de avións,perfumar o aire,creación de circuitos para mover pelotas de ping pong con abanos...

RECOMENDACIÓN LECTORA 5º EDUCACIÓN INFANTIL

 Eire quere compartir este libro" SOPA DE ARCOIRIS"ed.Piccolini, porque lle parece máxico, colorido e divertido,un conto para ensinar a importancia dunha alimentación sana.

Seguro que voa gustará!

MALETAS VIAXEIRAS

Este ano volvemos solicitar diferentes maletas viaxeiras. A maleta de ciencias, a inclusiva e a de banda deseñada foron algunhas das que recibimos no centro.

Sempre son un verdadeiro éxito nas titorías e unha fonte de motivación de gozo e de divertimento. Para o ano repetimos!

FAMILIAS de infantil no PDI DE" CIENCIA":2º trimestre

 No segundo trimestre tamén tivemos participación por parte das familias no PDI de centro.Unha nai ensinounos parte do seu traballo de podoloxía ,facendo plantillas  e por outra banda un pai trouxo o seu parapente de profesión e abriuno e explicounos como se tira do mesmo e as normas de seguridade que temos que ter.

PDI:Pezas musicais de vento

 Hoxe en educación infantil contamos coa presenza de talentos musicais como Diego Maceiras, Manuel Primoy, Héctor,Juanjo e Jose Angel nunha sesión musical con instrumentos todos de vento como a gaita, flauta, harmónica, didgeridoo, saxofón e acordeón, como motivo de querer coñecelos dentro do noso PDI dos segredos do aire.

OBRADOIRO DE ESCRITURA CREATIVA

Ao longo desta semana o alumnado de 1º, 2º, 3º e 4º realizou un obradoiro de escritura creativa da man de Antonio Fraga.

Nel traballamos o conto. Primeiramente falamos un pouquiño da súa estrutura e logo xa nos puxemos mans a obra coa nosa creación. Para que fora máis divertido, Antonio empregou diversas estratexias: con 3º e 4º os dados conta historias e con 1º e 2º unha bolsa misteriosa da que os nenos e nenas sacaron obxectos variados que tiñan que ir incluindo no conto conseguindo así unha mestura moi moi tola!

Unha vez feito o conto puxéronlle título e por último debuxaron a portada!

Foi un obradoiro moi entretido!

DIA DA POESÍA 2022

Este ano celebramos por todo o alto o "Día da Poesía". Queredes saber en que consistiu a actividade?

Primeiro de todo nas diferentes titorías traballamos esta tipoloxía textual tan especial: lemos poesía, vimos diferentes modelos, rimamos... 

A partir de aí inventamos a nosa propia, que tiña que ter como temática "A ciencia", algúns cursos escribiron sobre a ciencia en sentido amplo e outros, sobre aquel aspecto concreto que están a traballar dentro do proxecto documental integrado.

Feito isto, pasamos a limpo a creación e ilustramos para que quedara ben bonito.

Logo as profes encargáronse de encadrar os poemas e estes levaronse a diferentes comercios da localidade que expoñerían as nosas obras de arte nos seus escaparates para que os nenos e nenas os atoparan, se os atopaban, tiñan que cubrir a seguinte folla de rexistro. 

Esta actividade foi un verdadeiro éxito, deu gusto ver aos nenos e nenas buscando e lendo poesía polas rúas!

    

      

E, desta vez, participar tiña premio! Polo que os nenos e nenas que partiparon nesta iniciativa recibiron uns bulbos de gladiolos que de seguro que florecen ben fermosos.

Grazas nenos e nenas por participar, polo interese e pola implicación e grazas familias pola colaboración! 

 

VISITA Á BIBLIOTECA MUNICIPAL DE FENE

O xoves día 17 de marzo, o alumnado de educación infantil fixo unha visita á biblioteca municipal de Fene e á exposición " Un cordero bala entre dos montañas" de Sofía Piñeiro.Así o alumnado máis pequeno do cole puido ollar unhas pinturas moi coloridas e cheas de significado. 

A continuación, visitaron a Biblioteca Municipal, espazo coñecido pola maioría dos nenos e das nenas, ao que sempre gostan de ir para desfrutar da lectura.

SEMANA DA PRENSA

 Ao longo da semana pasada celebramos no centro a "Semana da Prensa" e como non, esta conmemoración tamén tivo un toque moi científico. 

Educación Infantil, 1º e 2º encargáronse de buscar novas científicas en diferentes xornais para posteriormente elaborar un mural no que se recolleu toda a súa procura. 

Terceiro e cuarto convertéronse en xornalistas por un día elaborando novas científicas! 

Posteriormente, creouse un xornal con todas elas que se repartiu nas diferentes aulas para que todo o cole as puidera ler.  Deixámosvos aquí algún exemplo.

Como xa sabedes, o alumnado de terceiro ciclo recibiu unha formación moi moi interesante na que traballaron as fake news. 

CONMEMORAMOS O 8 DE MARZO

O pasado 8 de marzo celebramos no centro o "Día da Muller".

Para conmemorar este día cada aula investigou previamente sobre unha científica e decorou un paraugas con datos sobre a súa biografía e os seus achados para a ciencia. Algunhas das elixidas foron: Ángeles Alvariño, Olimpia Valencia ou Isabel Zendal.

Con todos os paraugas creouse unha exposición na planta baixa da escola. Quedaron chulísimos. 

Outra actividade que realizamos estes días foi un mural con fotos das mulleres máis importantes das nosas vidas.

Ao final da mañá, todo o alumnado reuniuse na pista cuberta para bailar a canción Morra o Conto da Banda da Loba. 

Deixámosvos por aquí o vídeo deste acto tan emocionante. 

2ªFORMACIÓN LECTURA E FAMILIAS "AS FAKE NEWS"

O martes 8 de marzo tivemos de xeito virtual unha formación en Fake News ou noticias falsas, enmarcada dentro do programa de biblioteca "Lectura e familias". Esta formación foi dirixida ás familias, e paralelamente e de forma presencial, houbo unha formación máis específica para o alumnado de 5º e de 6º a través de obradoiros prácticos.

María, periodista da axencia Pingota Comunicación, explicounos que eran as fake news, os distintos tipos que hai e como recoñecelas. E fixo especial fincapé na importancia de frear a súa difusión, evitando compartilas cando as recibimos ou as lemos. Así mesmo, incidíu en que sempre debemos ser críticos/as coas noticias que lemos, e pensar se poden ser certas ou se poden tratar de bulos.