Día do Libro

O pasado 23 de abril conmemoramos no centro o Día do Libro. Para iso, por unha banda, levamos a cabo o tradicional amadriñamento lector, as e os maiores escollen un conto para as súas afilladas e afillados. O día acompañounos polo que puidemos gozar das lecturas compartidas no noso patio. 

Por outra banda, fixemos unha recollida de alimentos para o banco de Alimentos Rías Altas. A cambio dos alimentos doados, as nenas e nenos podían coller algúns dos libros de expurgo da biblioteca escolar. 

Logramos nada máis nin nada menos que 265 quilos de alimentos! 

LECTURA E FAMILIAS: Obradoiro con Pablo Otero

 "Todos temos unha historia que nos encanta contar unha e outra vez.

O meu avó, a vosa nai ou aquel curmán da tía segunda do papá que se perdera no Brasil.

Son historias e anécdotas que naceron na vosa familia,

que sempre se contan cando estades xuntos e que hai que coidar coma tesouros". 

A tarde do pasado 2 de abril tivemos na biblioteca un obradoiro impartido por Pablo Otero. Nel familias e alumnado elaboraron os seus libros de familia. Deixaron voar a súa creatividade e partindo dalgunha anécdota, chiste ou relato comezaron a traballar. Para iso, utilizaron material de refugallo e con paciencia e agarimo fixeron as obras de arte que vos deixamos a continuación. 

                                        Grazas Pablo, foi unha tarde fermosa. 

Visita dunha imprenta ambulante

O pasado mes de marzo o alumnado de 1º, 2º, 3º e 4º recibiu unha visita moi especial: Alouette Machine. Unha imprenta ambulante. 

Cris e Jean-Ba viaxan nunha furgoneta cos caixóns cheos de letras de chumbo e de madeira e iso foi o que nos ensinaron neste pequeno obradoiro. Contáronnos como se facían os libros antigamente e o laborioso que era xa que había que colocar cada letra dun xeito moi minucioso. Ademais disto as nenas e nenos puideron facer pequenas prácticas estampando os poemas que previamente elas e elas idearon coa temática do noso PDI: pegadas verdes. 

DÍA DA POESÍA

O 21 de marzo conmemoramos o Día da Poesía a través da elaboración de fermosos poemas inventados polas nenas e nenos do noso cole. A temática foi a do noso proxecto documental integrado: pegadas verdes. Algúns dos poemas estiveron adicados á contaminación da auga, outros ao coidado do medioambiente, dos animais... 

As mestras deixamos os poemas nos escaparates de 9 comercios de Fene para que o alumnado pola tarde puidera facer unha búsqueda dos mesmos seguindo un mapa. 

O día prestouse moito para esta actividade, o sol e a poesía iluminaron esa tarde por Fene adiante. 

ENCONTRO CON LOIS PÉREZ

O alumnado de 5º e 6º de primaria tivo un encontro co escritor Lois Pérez para falar sobre o seu libro A Gruta da Torre, que lemos nas aulas este trimestre.

A Gruta da Torre cóntanos a historia dun rapaz chamado Lois, que vai coa súa familia a pasar outro verán en Ribadeo. Quique, Greta e o resto da cuadrilla agardan por el, e ese ano hai tamén unha nena nova. Non a coñece, mais morre por falar con ela... Na vella biblioteca da Torre dos Moreno, Quique encontra un libro e, no seu interior, un misterioso documento que fala dun pasadizo. Onde estará? Deciden que teñen que atopalo. Unha aventura trepidante, atravesada pola forza da amizade, os primeiros amores e o valor dos libros, no Ribadeo de 1990.

Desfrutamos moito coa lectura do libro na clase, comentando o que lles ía acontecendo aos personaxes e imaxinando que pasaría a continuación. O libro fixo voar a nosa imaxinación, fíxonos rir ás gargalladas e, ás veces, emocionarnos bastante, e o encontro co seu autor non ía ser menos. Desfrutamos moito falando con Lois sobre o seu libro, preguntándolle por fin esas inquedanzas e dúbidas que ía aparecendo ao longo destas semanas, segundo avanzabamos na lectura, e escoitando as historias tan graciosas e curiosas que nos contou. Ata descubrimos que foi profe de Centieiras hai anos!

Moitas grazas, Lois, por animarnos a seguir gozando da lectura!

DÍA DA MULLER

O día 8 de marzo alumnado de Centieiras estivo traballando nos obradoiros propostos para cada curso.

Unha vez máis, quixemos reivindicar que segue sen haber unha igualdade real entre homes e mulleres no reparto das tarefas do fogar e no coidado das fillas e fillos, actividades que continúan a estar principalmente en mans das mulleres. O mesmo acontece coa porcentaxe de homes e mulleres en postos de responsabilidade e toma de decisións, que seguen estando maioritariamente en mans de homes.

Para facer fincapé na necesidade de seguir avanzando cara á ansiada igualdade, quixemos facer partícipes ás nosas alumnas e alumnos na realización de tarefas do fogar tales coma varrer e fregar o chan, coser, limpar os cristais e lavar, tender e dobrar a roupa. 

Aquí deixamos unha pequena mostra.

OBRADOIROS DE EDUCACIÓN SEXUAL

A semana pasada o alumnado de primaria tivo a sorte de contar con obradoiros de educación sexual chamados "De bo rollo!: Educación sexual para aprender a querernos ben", que aborda as verdadeiras inquedanzas daos nenos e das nenas, con enfoque sexolóxico, entendendo que para construir unha casa non podemos comezar polo tellado.

Foi un obradoiro moi interesante e ameno, útil e necesario, pois non hai maior protección que ensinar a rapazada a pensar, a quererse ben, a querer ben, a repectarse e a respectar.

DÍA DE ROSALÍA

 Hoxe, 23 de febreiro, conmemoramos o Día de Rosalía, unha das autoras máis importantes da nosa literatura. Para isto, tiñamos previsto saír polas distintas prazas do concello de Fene para recitar poemas de Rosalía, mais o mal tempo non nolo permitiu e, finalmente, realizamos o recital na pista cuberta do colexio.

 Fixérono todas e todos de marabilla, parabéns!

Ademais, coma sempre, contamos coa asistencia das familias que acudiron como público ao recital. Moitas grazas por acompañarnos, a pesar da chuvia e do frío.

CONTOS DE BOCA EN INFANTIL

A semana pasada tivemos a visita de Diego o pai de Lois para ler un conto, xa casi é o noso pai lector oficial! Nesta ocasión trouxo o conto El gigante: El secreto del abuelo. Unha historia de tolerancia onde coñecemos a un neno que co paso do tempo comprende que existen segredos demasiado grandes para estar ocultos. Grazas unha vez mais Diego por acompañarnos.

DÍA DA MULLER E DA NENA NA CIENCIA

A pasada semana conmemoramos o Día da Muller e a Nena na Ciencia a través de dúas actividades. O xoves visitáronnos polas clases algunhas compañeiras do cole, que actuaron como embaixadoras e representantes das nenas na ciencia. Con elas trouxeron varios obxectos moi interesantes, algúns deles que eran descoñecidos para todas e todos, e que nos chamaron moito a atención.
Selena e Daniela ensináronnos como eran e funcionaban os teléfonos antigos. Nayla e Antía explicáronnos para que serve un microscopio e como podemos empregalo. Thais e Valentina amosáronnos un zoótropo e puidemos ver como, ao xiralo, as imaxes do seu interior parecían moverse. Eimy e Zoe trouxeron uns mexilóns xigantes, especie que non podemos atopar na nosa zona pero que chega ata aquí pegada nos cascos dos barcos que veñen doutros lugares.

O venres recibimos a visita dunha muller científica, Ana. Ela é química e traballa no porto exterior de Ferrol. Ás nenas e nenos de Infantil e 1º ciclo veu contarnos en que consiste a súa profesión, amosounos como é o seu lugar de traballo e ensinounos algún vídeo sobre o mesmo.

Ao alumnado de 2º e 3º ciclo deunos unha charla sobre os Obxectivos de Desenvolvemento Sostible, relacionados co PDI e que xa estamos a traballar nalgunhas aulas. En grupos fixemos un pequeno traballo de investigación sobre os mesmos e logo realizamos unha posta en común para dar a coñecer aos outros equipos as conclusións obtidas.

Moitas grazas por acompañarnos!!!

MALETA DE SOSTIBILIDADE

Durante o mes de xaneiro desfrutamos na aula de 5º de educación infantil do marabilloso contido da maleta de sostibilidade que crearon para nós dende o equipo de biblioteca. Nela atopamos moitísima información sobre o PDI que estamos a desenvolver durante este curso; encantáronnos tanto os libros informativos coma os contos e aprendimos moitísimo con eles.

XANEIRO: Mes do lettering

 Dende fai uns anos, xaneiro consolídase como mes da escritura a man. Nalgunhas sesións do plan lector ao longo de este mes realízanse diferentes propostas: iniciación e práctica de trazos, creación de lemas e frases... Dependendo do interese e das habilidades de cada un. Traballamos concentración, destrezas motrices, perseverencia, coordinación... 

LECTURA DIXITAL E-ELBE.2

Desde a Asesoría de Bibliotecas Escolares ponse á disposición do alumnado a plataforma Bega Elbe-2 para ler libros en formato dixital gratuita. Todo o alumnado de educación infantil e primaria poderá acceder á plataforma, usando o seu identificador e contrasinal persoal facilitado a través de abalar.

Trátase de que coñezades que existe este recurso por se queredes dispoñer del no móbil, tablet ou ordenador. Puidéndoo usar online ou tamén descargando a app E-Elbe.2 nos dispositivos que se queira usar.

 O enlace online á plataforma é: https://bega-elbe2.edu.xunta.es/